Wie si Mir?

D'ACEN setzt sech zanter Juni 2014 fir d’Rechter an d’Interessie vun de Chargées de cours, d’éducation, d’enseignement an de remplacement an. Sidd Dir Chargé(e) ?


Beruffsaubildung

No dem Educatiounsminister Meisch an dem Mëttelstandsminister Lex Delles huet elo och de Staatsminister erkannt an ëffentlech geäussert, wéi wichteg d’Handwierk ass. Och 6 Joer no der Reform vun der Fonction Publique ass eng Revaloriséierung vun der Meeschterprüfung beim Lëtzebuerger Staat awer ëmmer nach net vollzu ginn.

Am Géijesaz zu Länner wéi Däitschland, Eisterräich an der Schwäiz, wou d’Meeschterprüfung mam Bachelor gläichgestallt ass, ginn eis Handwierker ëmmer nach an de B1 klasséiert, an domadder trotz hirem Ofschloss just op eng Première bezuelt. Dëst ass de Contraire vun enger Wäertschätzung, et weist, datt d’Politik d’Handwierk de facto a Wierklechkeet ëmmer nach net valoriséiert.

Bei der Reform vun der Fonction Publique 2015 goufe bekanntlech vill Sous-Gruppen net uerdentlech vertrueden a valoriséiert. Net just d’Chargéë mam Bachelor an Master goufen hei massiv diskriminéiert, well weder d’Politik nach d’Staatsbeamtegewerkschaft hir Rechter vertrueden hunn, et gouf ënner anerem och verpasst nieft dem am Gesetz integréierten Bachelor eben och endlech d’Meeschterprüfung ze valoriséieren.

Dës Revaloriséierung betrëfft beim Lëtzebuerger Staat ebe virun allem erëm d’Chargéen an eiser Beruffsausbildung. D’Chargéen an den Atelieren gi mat Meeschterprüfung rekrutéiert, also muss dës Meeschterprüfung och endlech an der Fonction Publique unerkannt ginn.

D’ACEN weist elo schonn säit iwwer 7 Joer ëmmer erëm op dës Defiziter hin. D’Handwierk brauch awer ebe méi wéi just waarm Wierder. Fir d’Handwierk attraktiv ze maachen, muss de Staat als alleréischten ufänken den Diplom vun eisen Handwierker endlech ze revaloriséieren.



Iegendwann geet et duer… gläich Aarbechtskonditiounen elo !


D’Pandemie mécht ganz däitlech, datt d’Enseignanten enger Beruffsgrupp ugehéieren, déi dem Virus staark ausgesat sinn. Am stäerksten ausgesat sinn d’Chargéen, déi deels 1/3 méi Coursen halen mussen ewéi d’Fonctionnairen. Verschidde Kolleegen hunn esou Kontakt zu bis zu 150 Schüler a just engem Dag!

Dëst mécht endgülteg erëm däitlech, datt bei den Aarbechtskonditiounen dringend eppes geschéie muss. Just d’Chargéë mussen als Employé de l’Etat bis zu engem Drëttel méi schaffen ewéi de Fonctionnaire. Esou en Zoustand wier an all anere Ministère e Skandal, wann do d’Employéë 50 amplaz de 40 Stonne schaffe missten. Hei musse Léisunge fonnt ginn, et ass net un den Employéen ee Manque un Enseignanten dauerhaft mat Méiaarbecht kompenséieren ze mussen.

Säit Joerzéngten herrscht an de lëtzebuergesche Schoulen awer eng Zwouklassegesellschaft. Néierens beim Lëtzebuerger Stat ass den Ënnerscheed bei den Aarbechtskonditiounen esou dramatesch tëscht Fonctionnairen an Employéen.

Bei der Fonctionnarisatiounsméiglechkeet fir d’Chargéë läit elo scho säit zwee Joer kee Gesetzestext vir. D’ACEN ass net begeeschtert vun enger Fonctionnarisatioun, fir déi en Enseignant no 15 Joer am Déngscht 70 Stonne Formatioun brauche soll, fir d’Examensstonne packen ze kënnen. Dëst weist ewéi kënschtlech dës Examensstonnen tatsächlech oflafen, wa 15 Joer Beruffserfarung am Schoulhalen een net qualifizéieren fir ebe Schoulhalen ze sollen. Trotzdeem muss et hei endlech en Gesetzestext ginn.

D’Altersdechargë vun de Chargéen ass eng op Pabeier geschriwwe Ligen. Si existéiert de facto an der Praxis einfach guer net. D’Altersdecharge muss bei gläicher Aarbecht endlech och gläich gerechent ginn!

Dat éischt Joer vum Stage ass fir Proffen a Chargéen identesch. De Chargé ass also keen onqualifizéierte Proff, mee just en net fonctionnariséierten Enseignant! A grad vill jonk Kolleege fänken hir Enseignantscarrière als Chargé un. „Méi Jonker fir de Beruff vum Enseignant motivéieren“ funktionnéiert awer ebe just, wann de Beruff och endlech fair Konditioune fir jiddereen bitt.

Politesch Aussoe wéi „Staark Enseignanten fir staark Kanner“ erginn nëmmen dann ee Sënn, wann dann och um Feld endlech Léisunge gesicht a fonnt ginn. D’Politik wonnert sech, wisou et ëmmer méi schwiereg gëtt Enseignanten fir eis Schoulen ze rekrutéieren a mécht monter weider mat der Ausbeutung vun de villen diploméierten Enseignanten, déi schonn an de Schoule schaffen.

Dofir muss dës Zwouklassegesellschaft endlech komplett ënnerbonne ginn. Beim Lëtzebuerger Stat muss endlech fir jidderee gëllen:


Gläich Aarbecht a gläichen Diplom = gläich Aarbechtskonditiounen!


Eenegung bei der vollwäerteger Diplomunerkennung fir d’Chargéen am Enseignement Musical

Léif Kolleeginnen, léif Kolleegen,

D’ACEN ass immens frou Iech matdeelen ze kënnen, datt et bei der Entrevue vum 15. Juli 2021 tëschent de Gewerkschaften ACEN an FGFC an de Ministeren Taina Bofferding a Claude Meisch, endlech zu enger Eenegung am Dossier vun der vollwäerteger Diplomunerkennung fir d’Chargéen am Enseignement Musical komm ass.

Am Kader vun der Reform vum Museksunterrechtsgesetz, déi am September 2022 wäert a Kraaft trieden, wäerten all d’Chargéen, déi bis dohi schonn en Service sinn, hir Diplomer vollwäerteg unerkannt kréien.


Déi momentan nach degradéiert Karriäre B1/E2, A2/E3 an A1/E3ter ginn den 1. Januar 2023 vollstänneg zu vollwäertege B1, A2 an A1 Karriäre revaloriséiert, wéi se och fir déi aner Servicer am ëffentlechen Déngscht gëllen. Domat gëtt eng grouss Ongerechtegkeet, déi 2017 bei der Gehälterreform vun de Gemengen entstanen ass, endlech aus der Welt geschaaft.

D’ACEN weist sech zefridden iwwer dës Eenegung a seet den zoustännege Ministere villmools Merci, datt si no laange Verhandlungen e weidere Schrëtt op eis duer komm si fir dësen Accord z’erméiglechen.

Säit Dezember 2019 huet d’ACEN sech onermiddlech dofir agesat, datt d’Chargéen am Enseignement Musical hir Diplomer vollwäerteg unerkannt kréien an domat déi Unerkennung kréien, déi se verdéngen. Dësen Asaz an dës Ausdauer hu sech schlussendlech bezuelt gemaach.

Zu gudder Lescht wëlle mir dann awer och Iech Merci soen, léif Chargéen! Dir hutt all déi Zäit als trei Memberen zou eis gehalen, hutt d’Hoffnung net opginn, och wann et heiansdo nach esou aussiichtslos geschéngt huet an hutt domat gewisen, datt een alles kann erreechen, wann ee geschlossen zesumme steet.

Nëmmen zesumme si mir staark an elo kënne mir all zesummen zefridden an d’Vakanz goen.

Mat ganz léiwe Gréiss,

De Comité vun der ACEN